Дзень Перамогі - свята радасці. У гэты дзень вучні і настаўнікі школы па традыцыі прайшлі па вёсцы святочным шэсцем да помніка воіну-афганцу Міхаілу Мацкевічу. Потым накіраваліся да помніка ахвярам фашызму, які знаходзіцца ў лесе за вёскай. Там сабраліся вяскоўцы, каб успомніць сваіх родных і блізкіх, што загінулі ў час вайны. Дырэктар школы Міхаіл Іванавіч Аліферовіч павіншаваў усіх са святам, прапанаваў хвілінай маўчання ўспомніць загінуўшых аднавяскоўцаў. Вучні 4 класа прачыталі вершы, а выхаванцы нядзельнай школы хрысціян веры евангельскай праспявалі песні, у якіх гучала малітва да Бога і просьба да ўсіх дарослых спыніць войны на планеце. З вуснаў протаіерэя Сергія Чыжа прагучала малітва аб убіенных і просьба быць чулымі адзін да аднаго, берагчы мір і спакой у нашым краі.